Бай-Тайга— уран шеверлерниң чурту. Кожуунувустуң ус-шеверлериниң, алдын холдуг кижилеривистиң бирээзи Экер-оол Сергеевич Салчактың 50 харлаан юбилейинге тураскааткан ийиги хууда делгелгези Тываның 60 Маадырлар аттыг Национал музейинге декабрь 5-те болуп эрткен. Хөйге билдингир чурукчу, даш, ыяш база сөөк оярынга болгаш өске-даа хевирлерниң уран чүүлүнге мастер Экер-оол Салчактың ажылдарының делгелгезин байырлыг байдалга Национал музейниң директору Каадыр-оол Алексеевич Бичелдей ажыдып, ооң ажыл-ижиниң дугайында делгереңгей тайылбырны берген. Бай-Тайга кожуун чагыргазының даргазы Чингис Салчак мастерге байыр чедирбишаан, "Бай-Тайга кожууннуң Улустуң мастери"-деп хүндүлүг атты тывыскан. Экер-оол Салчак амгы үеде республиканың эң-не тергиин сөөктен янзы-бүрү хевирлер оюп чазаар мастери, ооң шак ындыг ажылдары бистиң делгем чуртувуска чонну магададып, хөй санныг делгелгелерге, мөөрейлерге алдаржып сурагжаан. Дээди профессионал эртемниг чазаныкчы, мергежилиниң талазы-биле кижизидилге чорудуун тургузуп, амгы үеде бичии студентилерни өөредип турар. Бай-Тайга кожууннуң чонунуң өмүнээзинден кожууннуң удуртулгазы уран шевер киживиске, Салчак Экер-оол Сергеевичиге, юбилейин уткуштур байыр чедирбишаан, ак орукту, ам-даа бедик чогаадыкчы ажыл-ишти, салым-чаяанныг өөреникчилерни болгаш быжыг кадыкшылды күзеп тур.