Рубрика «Чаа чогаал-биле таныжылга“. Шүлүкчү, прозачы, шиичи, аас чогаал чыыкчызы Ульяна Маспын-ооловна Аракчаа-Величконуң 65 харлаан юбилейинге чарлаан “Чечен чугаа” мөөрейиниң киржикчилериниң чогаалдары-биле таныштырар-дыр бис. Хадың. Эрик кыдыынга чиирбей тыртып үнүп келгенимге дыка-ла өөрүп чоруур мен ийин, ынчалза-даа час дүжерге-ле, мени чулуумче киир чонуп, караам чажын ижип чоруур кижилер бары хомуданчыг! Ийе харын, ол-даа канчаар, мээң авамны, ачамны, акыларым-угбаларымны кончуг каржы Кижи деп амытан мен чаш турдумда, ыглап-сыктап, чаннып-чашпып турумда-ла, одура кезип аппарган чүве. Чүгле төжектер болуп артканнар. Ол кижи мээң ыы-сыымны та дыңнаан, та дыңнаваан... Үези кээр, мени база ол-ла кижи кезип аппаар болза, коргунчуун! Чалгынныг болзумза, ужупса!Даванныг болзумза, дезип чоруй барза! Эх, салымымның кээргенчиин... Кижилер аразында база шак-ла мындыг, мен дег үүлени чүктеп чоруур Кижилер бар чадавас, ынчалза-даа ындыг кээргенчиг салымны Кижилерге күзевес-тир мен. Тимур Кадын-Нава