Чаа өөредилге чылында Тываның көдээ школаларынга программа күүселдези-биле 8 башкы ажылдап эгелээр Тываның Өөредилге яамызы «Көдээ черниң башкызы» программа-биле республиканың кожууннарында көдээ школаларга ажылдаар дээш көжүп турар башкыларга чаңгыс катап бээр компенсация төлевирин алыр эрге дээш мөөрей шилилгезин эрткен 8 кордакчы-биле үш талалыг керээни чарган. Шупту кордакчыларның аразындан 5 чыл дургузунда ол угланыышкын-биле школага ажылдаар дээш 1 млн. рубль түңнүг компенсацияны алыр 8 кижи шилип алдынган. 50 муң чедир чурттакчылыг хоорайлар база «Көдээ черниң башкызы» программа-биле чедишпес кадрларын долдуруп болурун сагындыраалыңар, ынчалза-даа олардан бо чылын чаңгыс-даа чагыг кирбээн. Бай-Тайга кожууннуң Хемчикке эге класс башкызы, Барыын-Хемчик кожууннуң Барлык суурнуң школазынга математика, Чөөн-Хемчик кожууннуң Чыргакы школазынга орус дыл болгаш литература, Мөңгүн-Тайга кожууннуң Мугур-Аксының 1 дугаар школазынга төөгү болгаш ниитилел билиглериниң башкызы хостуг олуттарже конкурсту чарлаан. Тандының Успенка биле Улуг-Хемниң Хайыракан школалары математика болгаш физика, Сүт-Хөл кожууннуң Ак-Даш школазынга биология болгаш химия, Эрзин кожууннуң Бай-Даг школазынга англи дыл башкылары ажылдап эгелээр. Ыраккы кожууннарже кордакчылардан эң хөй: Бай-Тайга кожууннуң Хемчик школазының эге класс башкызынче 8, Эрзин кожууннуң Бай-Даг школазынга англи дыл башкызынче 7 билдириишкин кирген. Улуг-Хемниң Хайыракан школазының математика болгаш физика, Барыын-Хемчик кожууннуң Барлык школазының математика башкызынга ажылдаар күзелдиг чүгле 2 кижи бар болган. Шилилдени эрткен кордакчылар 2025 чылдың сентябрь 1-де ажылынче кирер. 2020 чылдан бээр Тывада эки ажылдыг «Көдээ черниң башкызы» федералдыг программаның күүселдези — кадрлар чедишпес көдээ школаларже башкыларны хаара тудар сорулгалыг. Башкылар тывылбас суурларже башкы кадрларны бо программа-биле чорудуп турар. Көдээ суурларда эвээш комплектилиг школаларны бирги ээлчегде кадрлар-биле четчелээр ужурлуг. Программа күүселдези-биле сөөлгү чылдарда 70 киржикчиниң 30-и республиканың эвээш комплектилиг школаларынче ажылдап чоруткан. #тывачазак #нацпроекты