Тываның Баштыңы
Владислав Ховалыг
Кызылдың Вавилин ээтпээ микрорайонунда социал объектилер тудуун хынаан. Амгы үеде ол микрорайонда уруглар сады болгаш спорт залын тудуп турар. Кызыл – Кара-Хаак оруунда орук айыыл чок чоруун хандырар дериглерни тургузар ажылдар кидин түлүк.
– Бистиң Президентивис Владимир Владимирович Путинниң ажытканы чаа школаны долгандыр өске-даа социал инфратургузуг объектилерин тудуп турар бис: бо чылын «Өг-бүле» национал төлевилел-биле 280 олуттуг уруглар садын, ол ышкаш спорт-фитнес төвүн тудуп эгелээн бис. Дараазында поликлиника оран-савазын тудары планнаттынган. Уруглар садының тудуу 2027 чылда доостур болза, келир чылын спортзал ажыглалче кирер» – деп, Тываның Баштыңы бодунуң Телеграм каналында дыңнаткан.
«Өг-бүле» нацтөлевилел езугаар өөредилге черлеринге немелде олуттарны тургузуп, уругларны эки байдалдар-биле хандырар дээш, Вавилин ээтпээнде 280 уругга чаа уруглар садын тудуп турар.
«Бизнес-спринт» (Спортту шилип алыр мен) федералдыг төлевилел езугаар күш-культура-спорт залының тудуу чоруп турар. Ол чаңгыс каът оран-саның ниити шөлү 850,19 дөрбелчин метр болур. Залга биче бут бөмбүү, хол бөмбүү, баскетбол ойнаар шөлдерни дериир. Немей туткан черинге вестибюль, херээжен болгаш эр улустуң солуттунар өрээлдери, тренерлер болгаш техниктиг өрээлдер, арыгланыр черлер турар.
Владислав Ховалыг Кызыл – Кара-Хаак оруун хынап чорааш, ооң шынарынче онза кичээнгейни угландырган, чүге дизе микрорайон биле хоорайны тудуштурган ол орукта транспорт шимчээшкини дыка улуг. Амгы үеде оруктуң 6,5 километрден 10-гу километринге чедир участокта эде чаартылга ажылдары чоруп турар. Ону «Амыдыралга инфратургузуг» национал төлевилел езугаар чорудуп, оруктуң айыыл чок чоруунуң дериг-херекселдерин тургузуп, чаагайжыдар.
«Планда чадаг кижилер эртер тос черни, 18 автобус доктаамын, 9-ку километринге бир светофорну база 24 орук белдирлерин кылыры көрдүнген. Чадаг кижилер кылаштаар черлерни база албан кылыр» – деп, Владислав Ховалыг дыңнаткан.