
"Арага амгы ниитилелдиң чидиг тургустунуп турар айтырыы апарган.
Ниитилелде чурттап турар дыка хөй кижилерниң материалдыг байдалы экижип турар. Ындыг турбуже, оларнын аразында безин аас-кежиин чедип албаан кижилер эвээш эвес.
Аныяктар аразында арагадан когарап чоруурларның саны көвүдеп турар.
Арага болгаш арагалаар чоруктуң хайындан чеже өг-бүле чарылган, чеже кижи ада-иелерин чидирген, та чеже ажы-төл бүдүн эвес өг-бүлеге өскен! Эриг баарлыг ие кижиниң ынакшылын көрбээн, адазының чагыг-сөзүн дыңнаваан төлдер чеже болуп турар?
Чиик бодалдарга чеже алзыр бис?! Ынчангаш боттарывыс шажын чүдүлгевис, чаагай чаңчылывыс сагып, өөренип көрээлиңер!
Эр кижиниң хүлээлгези дээрге - өг-бүлезин камгалаары.
Шажын чүдүлгеден ырак улус болза, оода эр кижиниң бүдүжүнге дүгжүр болза эки.
Акша-көпээвисти арага садарынын орнунга, амыдыралга ажыктыг чүүлдерни садып алыр болза эки.
Ашак кадай кады арагалаарга шынап-ла - чут.
Оларны шын орукче углап баштап, чагыпсургап, кижизидери ниитилелдиң база бир чидиг айтырыы болуп артпышаан.
Арага - дээрге бүгү-ле нүгүлдүг кара үүлелерниң үнер дазылы болур деп чугаалап каан. Эзиртир суксун угаанны мугулайландырар, бүгүле дырыжаңнааш аажы - кылыктарның күш хоранын көвүдедир болгаш чогуш-содаага, аас-дылга,чедирер. Оон-даа коргунчуг чүүл, арага ижин-баар аарыын болгаш өске-даа аарыгларны күштелдирер, анаа-ла куруг ажык чокка байлакшылды эвээжедип кааптар, өг-бүлеге болгаш ниитилелге алгыш-кырышты, бот-боттарын көрүшпес чорукту болдурар. Ынчангаш араганың ниити болгаш бот-тускайлаң, үргүлчүлелдиг болгаш кыска хуусаада кижиге чедирер хоразының дугайында бодап, оон сайгарылгазын кылып тура, аажок кичээнгейлиг болуру кончуг чугула" - деп Өвүр кожууннуң Даа ламазы Шолбан башкы тайылбырны берген.